AMAGÜESTU 2021

 Esti añu l'amagüestu celebrámoslu'l 10 de payares pero enantes fuéramos a la gueta un día d'ochobre.  

Los dos díes fizo perbono, disfrutamos d'un sol y d'un paisaxe de seronda nel Parque Natural de Redes espectacular. 

El día de la gueta foi mui fructíferu, garramos pila d'elles y Susana preparónosles asaes unos cuantos díes pal aperitivu.

Díes enantes de l'amagüestu dende l'área de Llingua Asturiana trabayamos l'orixen d'esta fiesta y ficimos unes monteres picones pa poner esi día. 

Nun requexu del patiu taba too preparao y a la hora del recréu comimos les castañes asaes con sidra dulce pa dempués disfrutar como yera tradición enantes de pandemia, de los xuegos tradicionales de la mano de l' asociación 6 Conceyos. 

Por equipos interniveles fuimos pasando polos zancos, esquís, pesca de botelles, la rana, carrera de panoyes, la llave... y munchos más pa finar col tradicional tiru de cuerda... 

Foi un día perprestosu pero echamos muncho de menos la compañía de les families que n'esta xorná tantu yos presta venir.

Equí vos dexamos unos vídeos como resumen del día.  

AMAGÜESTU!!!!

Como tolos años pela seronda nel cole celebramos esta fiesta que tanto nos presta a tolos que pertenecemos a esta gran familia que somos el colexu El Truébanu, el amagüestu.
Esti añu tuvimos la suerte de contar otra vegada cola Asociación Cultural 6 Conceyos.
Préstanos abondo xugar a toos esos xuegos tradicionales que nos traen y participamos toos... neñes, neños, pas, mas, güelos, güeles y maestres...
Dempués comimos toos xuntos un menú d'espicha y de postre como nun podía ser d'otra manera "castañes y sidra dulce".
Muchísimes gracies a la Asociación 6 Conceyos que tienen esa paciencia infinita y esi buen facer pa con toos...  

Dexámosvos un vídeo pa que lo veáis... 

FACIENDO VAN LOS RAPAZOS Y RAPACES DEPRENDIENDO

A lo llargo d´esti trimestre tamos trabayando, ente otres coses, el tiempu meteorolóxicu.

Pa facer más prestoses les clases d’asturianu, ficimos un telediariu dando el parte del tiempu, como na tele. Asina que Haya y Guillém yeren los presentadores; Alejandro yera el encargáu de colocar los debuxos nel mapa d’Asturies y Érica yera la de los efeutos especiales.

Y pa que participare tol mundiu nesta actividá, también ficimos anuncios de propaganda.

Nahuel, Diego y Juan anuncien un prestosu viaxe per Xixón, gratuítu… y si alcuentren algo meyor… móntese.

Guillém, Alejandro e Irene anuncien una supermoto, la meyor de toes.

Paula, Érica, Haya y Ainhara invítenmos a dir de rebaxes.